Personvernerklæring

Versjon 1.16 · Gjeldande frå 6.11.2026

Denne erklæringa skildrar korleis Logolink ID handsamar personopplysningar i tråd med GDPR og norsk lov. Her finn du kva data me samlar inn, kvifor, og korleis du tek kontakt.

1.Behandlingsansvarleg#

Logolink AS. Kontakt: [email protected].

2.Føremål og behandlingsgrunnlag#

Konto og tilgangsstyring — Opprette og administrere brukarar, autorisere tilgang. Behandlingsgrunnlag: avtale/berettiga interesse.
Førespurnader om tilgang — Handsame og vurdere førespurnader om tilgang til portalen, og kontakte deg om førespurnaden. Behandlingsgrunnlag: tiltak før avtaleinngåing og berettiga interesse (GDPR art. 6(1)(b) og (f)).
Levere tenesta — Filhandtering, samhandling, kundeleveranse. Behandlingsgrunnlag: avtale.
Tryggleik og misbruksvern — Loggar, feilsøking, misbruksdeteksjon og vern av offentlege skjema mot spam og automatisert misbruk. Behandlingsgrunnlag: berettiga interesse.
Feilovervaking og ytingsdiagnostikk — Automatisk innsamling av tekniske feilrapportar og ytingsinformasjon for å oppdage og rette feil i tenesta. Behandlingsgrunnlag: berettiga interesse (GDPR art. 6(1)(f)).
IP-logging for tryggleik — Fullstendige IP-adresser blir lagra ved innlogging, innsending av skjema og andre viktige hendingar for å oppdage og førebyggje svindel, misbruk og uautorisert tilgang. Behandlingsgrunnlag: berettiga interesse (GDPR art. 6(1)(f)).
Nyheitsbrev — Sende nyheitsbrevet «Nytt frå Logolink» til dei som har meldt seg på. Behandlingsgrunnlag: samtykke (GDPR art. 6(1)(a)). Sjå eige avsnitt nedanfor.
KI-assistanse i sakshandsaminga — Sortere e-post som kjem til kundestøtta, lese meldingar frå kundar i samtalane i portalen, hjelpe tilsette med å finne fram i prosjekt og dokument, lage utkast til tekstar om prosjekt og designforslag, setje opp linjer på prisestimat, tilbod og ordrestadfestingar, lese prislister og prissvar frå leverandørar, hjelpe tilsette med prisførespurnader til leverandørar, setje opp felta i trykkmalar og lese filer som tilsette legg ved når dei spør KI. Ein person les alltid gjennom og avgjer. Behandlingsgrunnlag: berettiga interesse (GDPR art. 6(1)(f)). Sjå eige avsnitt nedanfor.

3.Kategoriar av data#

Identifikatorar (e-post, namn), rolle, organisatorisk tilknyting.
Opplysningar frå førespurnader om tilgang: namn, e-post, telefon, firmanamn, organisasjonsnummer, nettside og eventuell melding du sender oss.
E-post du sender til kundestøtta: namn, e-postadresse, emne og innhald.
Aktivitetsloggar (innlogging, endringar), filmetadata.
Teknisk data: fullstendig IP-adresse (blir lagra for tryggleik og svindelførebygging), user agent, nettlesarinformasjon, einingstype.
Feilrapportdata: stack traces, URL ved feiloppdaging, nettlesarversjon og einingstype. IP-adresser i feilrapportar blir ikkje lagra.

4.Lagring og deling#

Me brukar desse databehandlarane. Dei handsamar opplysningane berre på våre vegner, og me har databehandlaravtale med kvar av dei.

Supabase — database, innlogging og lagring. Driven av Amazon Web Services i Stockholm, Sverige.
Hetzner — lagring av filer som blir lasta opp i portalen. Helsingfors, Finland.
Bunny (BunnyWay) — lagring og levering av offentlege filer, til dømes logoar og produktbilete. Lagra i Stockholm, Sverige, og levert gjennom eit globalt nettverk.
Amazon Web Services (Amazon SES) — sending av e-post frå portalen (Stockholm, Sverige) og mottak av e-post til kundestøtta.
Resend — reserveløysing for sending av e-post, berre når Amazon SES ikkje er tilgjengeleg. USA.
Sentry (sentry.io) — feilovervaking og ytingsdiagnostikk. Data blir lagra i EU (Sentry EU-region). Sjå https://sentry.io/privacy/ for meir informasjon.
Cloudflare — vern av offentlege skjema mot spam og automatisert misbruk. I den samanhengen kan IP-adresse og tekniske opplysningar handsamast.
Vercel — testversjonar av portalen som berre tilsette brukar. Testversjonane les den same databasen som portalen. USA.
Anthropic — KI-funksjonane i portalen (språkmodellen Claude). USA. Sjå «Bruk av kunstig intelligens (KI)» nedanfor og https://www.anthropic.com/legal/privacy.
PowerOffice — rekneskapssystemet vårt. Kundeopplysningar og ordrar frå aksepterte tilbod blir overførte dit. Noreg.

Når opplysningar blir handsama i USA, byggjer overføringa på EU-kommisjonen sine standard personvernvilkår (SCC), som er ein del av databehandlaravtalen med leverandøren.

Eventuelle underdatabehandlarar blir berre brukte med tilstrekkelege vernetiltak.

5.Lagringstid#

Kontoopplysningar: så lenge du har konto og ein rimeleg periode etter avslutning.
Førespurnader om tilgang: blir oppbevarte så lenge det er nødvendig for å handsame førespurnaden, og blir sletta eller anonymiserte innan rimeleg tid dersom han ikkje fører til ein konto.
Tryggleiks- og aktivitetsloggar: normalt 6–12 månader.
Feilrapportar (Sentry): 90 dagar.
Filer/innhald: i samsvar med kundeforhold og avtale.
Nyheitsbrev: sjå «Nyheitsbrev frå Logolink» nedanfor.
KI-assistanse: sjå «Bruk av kunstig intelligens (KI)» nedanfor.

6.Nyheitsbrev frå Logolink#

Melder du deg på nyheitsbrevet «Nytt frå Logolink», er Logolink AS behandlingsansvarleg for opplysningane om deg.

Kva me lagrar — E-postadressa di, namnet ditt om du oppgav det, og om du er påmeld eller avmeld. I tillegg lagrar me prov på samtykket: kvar påmeldinga kom frå, versjonen av teksten du sa ja til, tidspunktet, og IP-adressa og nettlesaren din då du stadfesta. Me lagrar òg kva nyheitsbrev du har fått, og om e-posten vart levert, ikkje kunne leverast eller førte til klage.
Føremål — Sende deg nyheitsbrevet, dokumentere at du har sagt ja, og handtere avmelding, e-post som ikkje kan leverast, og klager.
Behandlingsgrunnlag — Samtykke (GDPR art. 6(1)(a) og markedsføringslova § 15). Du stadfestar påmeldinga på e-post før du får noko frå oss.
Ingen sporing — Me registrerer ikkje om du opnar nyheitsbrevet eller klikkar på lenkjer i det.
Avmelding — Kvart nyheitsbrev har ei lenkje der du melder deg av med eitt klikk. Du kan òg skrive til [email protected]. Avmeldinga gjeld straks, og samtykket ditt er då trekt tilbake.
Utsending og lagring — Nyheitsbreva blir sende gjennom Amazon Web Services (Amazon SES) i Frankfurt, Tyskland. Opplysningane blir lagra hos Supabase, driven av Amazon Web Services i Stockholm, Sverige.
Lagringstid — Så lenge du står på lista. Stadfestar du ikkje påmeldinga, blir ho sletta etter 30 dagar. E-postadressa di blir fjerna frå utsendingsloggen 90 dagar etter kvar utsending. Melder du deg av, tek me vare på at du har meldt deg av, slik at du ikkje blir lagd til igjen ved ein feil. Ber du om sletting, slettar me alt om deg og tek berre vare på ein einvegs hash av adressa, slik at ho ikkje kan leggjast inn igjen utan at du sjølv melder deg på.

7.Nyheitsbrev som andre verksemder sender#

Verksemder som brukar Logolink Studio, kan sende sine eigne nyheitsbrev gjennom portalen. Då er verksemda behandlingsansvarleg for lista, og Logolink er databehandlar etter vilkåra for nyheitsbrev. Spørsmål om ei slik liste går til verksemda som sende nyheitsbrevet. Får me dei, sender me dei vidare.

8.Bruk av kunstig intelligens (KI)#

Me brukar kunstig intelligens som eit hjelpemiddel for dei tilsette hos Logolink. Ho erstattar ikkje vurderinga til eit menneske.

Kva me brukar KI til — Sortere e-post som kjem til kundestøtta: kva e-posten gjeld, og kva kunde og prosjekt han høyrer til. Lese meldingar som kundar skriv i samtalane i portalen: KI føreslår kva meldinga gjeld, til dømes at kunden godkjenner eit designforslag, ønskjer ei endring eller nemner ein dato, og kva prosjekt ho høyrer til, slik at ein tilsett ser kva som må gjerast. Svare på spørsmål frå tilsette om kundar, prosjekt, tilbod, designforslag og e-post som ligg i Innboksen. Lage utkast til prosjektbeskrivingar, mellom anna teksten «Om prosjektet» på prosjektsida di. Hjelpe designaren når eit designforslag blir sendt: foreslå kva som skal stå i lista over det me lagar til prosjektet, lage utkast til tittelen og skildringa av forslaget og til meldinga som følgjer med det, og lese av telefonnummer, e-post- og nettadresser på sidene, så dei kan samanliknast med det me har registrert om verksemda di. Lese prislister frå leverandørane våre: når ein tilsett, eller leverandøren sjølv, lastar opp ei prisliste (PDF, bilete, rekneark eller e-post), les KI av varer og prisar, slik at dei kan sjåast over før dei blir lagra. Lese prissvar frå leverandørane våre: når ein leverandør svarar på ein prisførespurnad, les KI svaret og set opp prisane per post i førespurnaden, saman med spørsmåla leverandøren stiller og vilkåra han set for prisen, slik at ein tilsett kan gå gjennom dei. Hjelpe tilsette med prisførespurnader til leverandørar: føreslå postane i førespurnaden ut frå filene som er lagde ved, til dømes skisser og teikningar, og det ein tilsett skriv, og lese gjennom førespurnaden før han blir send, for å finne det ein leverandør kan misforstå. Setje opp linjer på prisestimat, tilbod og ordrestadfestingar: KI føreslår varer, mengder og prisar ut frå prosjektet, kva same vare har kosta tidlegare og filer som ein tilsett legg ved, til dømes eit bestillingsønske eller eit tilbod frå ein leverandør. Ein tilsett ser over kvar linje før ho blir lagd til. Ein pris som KI har anslått sjølv, må ein tilsett endre eller stadfeste før dokumentet kan sendast. KI kan òg setje opp malar for prisestimat, som tilsette fyller ut og brukar om att. Setje opp trykkmalar: når ein tilsett lagar ein mal for ei trykksak, til dømes eit visittkort, kan han eller ho leggje ved ei eksempelfil frå designaren. KI føreslår kva tekstane i fila er, til dømes namn, tittel og kontaktlinjer, og kva kunden skal fylle ut. Kvar felta skal stå, les portalen sjølv av fila. Det gjer ikkje KI.
Kva opplysningar som blir sende — E-post du sender til kundestøtta: namn, e-postadresse, emne og innhald. Opplysningar om prosjekta dine: plan, dokument, ønskjer, tilbodslinjer, e-post knytt til prosjektet og meldingar i prosjektsamtalen. Når KI les ei melding frå ein kunde: meldinga og dei siste meldingane før ho i same samtale. I staden for namn står det berre om det er kunden, me eller ein leverandør som skreiv. E-postadresser, telefonnummer og beløp blir fjerna før meldingane blir sende. Bilete som ligg i prosjektet, til dømes bilete du har lagt ved ein førespurnad. Designforslag: tittel, skildring, filnamn, merknadene du ser på filene, endringsønska dine og lista over det me lagar. Også inntil seks sider av filene i designforslaget, sende som bilete utan metadata. Opplysningar om verksemda di og kontaktpersonane der, og namn på tilsette. Tekst som ein tilsett sjølv limer inn. Prislister som blir lasta opp: innhaldet i fila slik ho er, til dømes namnet og kontaktopplysningane til ein seljar om dei står i fila. Sider blir sende som bilete utan metadata. Prissvar frå leverandørar: prisen, leveringstida og det leverandøren har skrive i svaret, saman med postane i førespurnaden. Namn og kontaktopplysningar til leverandøren blir ikkje sende med, men kan stå i teksten leverandøren har skrive. Prisførespurnader til leverandørar: tittelen, postane, instruksane, den korte skildringa av oppdraget og namna på filene. Når KI skal føreslå postar: inntil åtte sider frå filene ein tilsett vel ut, PDF-filer og bilete, sende som bilete utan metadata og saman med teksten på sidene. Filene kan kome frå prosjektet ditt, til dømes ei skisse du har sendt oss. Når KI set opp linjer på eit prisestimat, tilbod eller ei ordrestadfesting: varene og prisane i rekneskapssystemet og nettbutikken vår, og kva same vare har kosta tidlegare, også kva ho kosta sist for kunden det gjeld. Filer som ein tilsett legg ved når han eller ho spør KI (bilete og PDF): innhaldet i fila slik ho er, til dømes namnet og kontaktopplysningane på eit eksempelvisittkort. Sider blir sende som bilete utan metadata. For ei eksempelfil til ein trykkmal blir òg teksten i fila send, med storleik og plassering. Prisar og beløp frå portalen blir fjerna før noko blir sendt, utanom der prisane er det KI skal arbeide med: prislister som blir lasta opp for å bli lesne, prissvar frå leverandørar, og linjer på prisestimat, tilbod og ordrestadfestingar. Prisførespurnader og filene som er lagde ved dei, blir sende slik dei står.
Eit menneske avgjer — KI gjer ingen endringar på eiga hand. Ein tilsett les gjennom og godkjenner alle forslag og utkast. Me brukar ikkje KI til automatiserte avgjerder som har rettsverknad for deg eller påverkar deg tilsvarande (GDPR art. 22).
Merking — Tekst på prosjektsida di og i skildringa av eit designforslag som er skriven av KI og ikkje er endra av ein tilsett, er merkt «Laga med KI».
Kven som kan bruke KI — Tilsette hos Logolink. I tillegg kan leverandørar me har gitt tilgang, be KI lese si eiga prisliste. Du som kunde kan ikkje sjølv setje i gang KI-handsaming i portalen. Sender du e-post til kundestøtta, blir e-posten sortert automatisk, med mindre du eller verksemda di har bede om at KI ikkje blir brukt (sjå under). Skriv du ei melding i ein samtale i portalen, blir ho lesen automatisk på same måte. Det same gjeld prissvar frå leverandørar: dei blir lesne når dei kjem inn.
Leverandør og overføring — Me brukar språkmodellen Claude frå Anthropic. Opplysningane blir handsama i USA, med EU-kommisjonen sine standard personvernvilkår (SCC) som overføringsgrunnlag. Anthropic brukar ikkje opplysningane til å trene modellane sine. Dei blir normalt sletta hos Anthropic innan 30 dagar. Innhald som tryggleikskontrollane til Anthropic flaggar, kan bli lagra lenger.
Kva me lagrar sjølve — Sorteringa av ein e-post blir lagra saman med e-posten og sletta saman med han. Samtalar tilsette har med KI i portalen, blir sletta kvar natt. Filer som ein tilsett legg ved i ein samtale med KI, blir sletta saman med samtalen, med mindre han eller ho lagrar fila i prosjektet. Då blir ho ei vanleg prosjektfil. Forslag til felt i ein trykkmal blir ikkje lagra før ein tilsett tek dei i bruk. Forslag frå KI når eit designforslag blir sendt, blir ikkje lagra: dei blir sletta etter høgst 12 timar. Det same gjeld telefonnummer og adresser som KI les av filene i eit designforslag. Ei prisliste som blir lasta opp for å bli lesen, blir lagra saman med prisboka når linene blir tekne inn, slik at den som godkjenner lista kan samanlikne med det leverandøren sende. Blir ho ikkje brukt, blir ho sletta etter eit døgn. Det KI las av fila, blir lagra saman med fila og sletta med ho. Det KI las av ei melding frå ein kunde, eller av eit prissvar frå ein leverandør, blir lagra saman med meldinga eller svaret og sletta saman med det. Berre tilsette ser det. For ei melding er det berre kva ho gjeld, til dømes ei godkjenning eller ein dato, ikkje teksten i henne. Forslag til postar i ein prisførespurnad og gjennomlesinga før han blir send, blir ikkje lagra. Forslag til linjer på eit prisestimat, tilbod eller ei ordrestadfesting blir sletta med samtalen kvar natt. Ei linje som ein tilsett legg til, blir ei vanleg linje på dokumentet, og det blir notert kvar prisen kom frå. Tek ein tilsett i bruk eit forslag, blir det notert i historikken til prosjektet at endringa kom frå KI. Utover det lagrar me berre tal på bruken: kven som brukte KI, når og kor mykje, ikkje kva som vart spurt om eller svart.
Protest og reservasjon — Du kan protestere mot at KI blir brukt på opplysningar om deg. Skriv til [email protected]. Då sender me ikkje lenger opplysningar om deg til KI-tenesta: e-post frå deg blir sortert av ein tilsett, og kontaktopplysningane dine blir ikkje med i det KI-en får sjå. Namnet ditt kan likevel stå i tekst som andre har skrive, til dømes i ein e-post eller ei melding i ein prosjektsamtale.
Reservasjon for verksemder — Ei verksemd kan på same måte be om at KI ikkje blir brukt på kundeforholdet. Då blir ingen opplysningar om verksemda, prosjekta eller kontaktpersonane hennar sende til KI-tenesta. E-post frå ei adresse me ikkje kjenner att, kan likevel bli sortert før me veit kven han kjem frå.

Innsyn — få innsyn i alle personopplysningane dine.
Dataportabilitet — eksporter personopplysningane dine som JSON.
Rett til å bli gløymd — be om sletting eller anonymisering.
Retting — be om retting av feilaktige data.
Avgrensing — stopp handsaming av personopplysningane dine.
Protest — protester mot handsaming.

Send førespurnad til [email protected] for å utøve rettane dine.

Meiner du at me handsamar personopplysningar i strid med regelverket, kan du klage til Datatilsynet (https://www.datatilsynet.no). Me set pris på om du tek kontakt med oss først, slik at me kan prøve å rette opp i det.